Amasa-in Zomibaptist.com min in cibai ka hong buk uh hi. Tu ciang dong hong kem-a hong gualzawhpih i biak Pasian’ min i phat hi.

Mizogam-a om Zomite in eima pau leh ham teek mah tawh Pasian i biak theih nading ci-in leh, Mizogam Zomite’ dinmun hong kilaptoh nading ngimna tawh 1982 kumin ‘Zomi Baptist Church’ ci-in biakna Pawlpi khat na kiphuan hi. Pasian huhna leh ompihna tawh tuni dong ZBC pawlpi in mainawt zel in, 2007 kumin Silver Jubilee pawi zong kizang khin ta hi.

Pawlpi a khan semsem mah bangin a mite zong kikhangto zel in, Mizogam sung bek hi nawn loin, India gamsung mun tuamtuamah hi ta leh, foreign gam dongah – kumpi nasem, sangkah, sinna tuamtuam nei, nisim nekzong cih bangin a hunkhop ki-om ta hi. Tua hi-in Pawlpi thu leh la tuamtuamte kizaktuah, kitheihsak tuah nading  leh, khat leh khat tha i kipiak theih nading ci-in hih bangin website hong kibawl ahi hi. Tua bek tham loin, leitung mun tuamtuama a om Zomite in ZBC Pawlpi thu leh late a kicingzaw leh a hoihzaw-a hong theihpih nading uh deihna zong hi pah hi.

Hih website pen ZBC Pawlpi in official-a a bawl hi loin, ZBC Pawlpi khualna leh deihsakna tawh a lunggulh deuh leh a hi thei teng in kikumkhawm, kihuhkhawm-a kibawl ahi hi.

Tua hi-in hih website pen a neituam ki-om se lo a, i vekin a nei, a innteek hi hang cih phawkin a kuamapeuh in thasaan a, thu leh la tawh ahi zongin tha kipia ciat dingin hong kingen hi.

Pasian in thupha hong pia ciat ta hen.

Site Administrators