|
Tunai India gam lam leh Tulsa khua a Zomi Nam Ni zangin ka zinna panin khantohna gim nam kasak pawl khat kong gelh hi. Minam khat peuhpeuh in khangtohna manawh-zaw hiam kiamsuk lam manawh-zaw hi hamtang hi. Tua bangin ki-en ding hi leng Zomite khantohna lam manawh i hih ciamtehna hih a nuai bangin ka mu hi.
1. Zomi Christian Fellowship, Kolkata: February 7, 2010 ni-in Kolkata Zomi kikhopnaah hunpi zang dingin ka zintunna uh Liankhumte inn panin Sia Lalzamangin hong la hi. Amah Sia Mang pen a kum a naupan hangin Kolkata a India kumpi zum Pension and Provident Fund lam a ulian Commissioner, leh Kolkata ZCF a chairman ahi hi. Tua ni citciat Communist Party of India (Marxist)-te in mass rally a neih ni uh ahih manin kikhopna minute 40 sung a tun ding nai khat leh a lang khawng ka pai uh hi. Komau bangin a dangte zongin haksatna na tuak ciat uh hi. Ka lungdam mahmahna ahih leh India khuapi tuamtuam a teng Zomi uliante a kipan nupi papi, nungak tangval; biakinn lam zuan teitei ka muh ciangin lungkimhuai kasa hi. Biakna inn lam bangbang hi leh zuan a i pai laiteng lametna hong pia hi. America gam zong ni dangin biakna lam hahkat kisa, company a tamzawte'n lunch-break hun sungin thunget kikhopna bang nei uh hi. Tua banga Pasian lam dangtakna kum tampi a neih manun a gam uh khangto hi. Lian Naulak (amah zong Kumpi nasepna a ulian) in Kolkata vanleng tualah ama mawtaw tawh hong na muak a, kong ciah ding uh ciangin zong hong kha kik hi.
2. Zomi Christian Fellowship, Guwahati: February 14, 2010 ni-in Guwahati Zomite makaihna tawh kikhopna nuamtakin ka zang thei uh hi. Guwahati sunga Zomi kikhopna Evangelical Baptist Convention church u leh naute kimtakin hong kikhawm thei uh hi. Kuki Worship Service leh Hmar Christian Fellowship panin taangmi khat leh nih hong kihel thei uh a, mi za thum val kikhawm zihziah in hun ka zat laitakun, ka lungsimah Late 133: “En un, sanggamte pumkhat suakin a tutkhawm uh ciangin bang zahin hoihin nuam ahi hiam?” cih hong kilo velval hi. Denomination hangin i kikhen hangin i lungsimin hong khen lo hi. Zomite khangto ding i deih leh vai neih khop leh zat khop i hanciam ding kisam mahmah kasa hi. Hih bangin kikhopna kisiim thei, kikawm thei i hih manin khantohna gim nam kasa hi. Tua kikhopna-ah Rev. Pum Kam, pastor ZCF in hun hon thungetna hong nei hi. Hun uk pen Lalawmpuia Ngaihte hi a, amah college a kah lai pek panin Pasian it mi a ka theih ahi hi. MBA a zawh khit ciangin tu'n company khatah semin, Guwahati ZCF ah secretary zong ahi hi. Kikhop tawp ciangin Pu. Thiauzakhup Hangzo, income-tax Chief Commissioner laibu khat ka piak leh aman (price) en masa in $ 15 man ahih lam a muh ciangin, “Bang zah man ding hiam?” hong ci hi. Ken zong, “Man nei loin kong piak hi” ka cih leh, “Maizen” hong ci hi. Tang. Kapno la “Topa laptoh Zomite” cih la bang hong phawksak hi.
3. 62nd Zomi Nam Ni, Tulsa, Oklahoma: Zomite tenna Tulsa khuapi a tul nawn lo ding khua-ah Zomi Innkuan Oklahoma-te thusiamna tawh zinmang dingin Feb 19, 2010 ni-in Tulsa ka tung hi. Zomi Nam Ni hun Jenks High School auditorium ah kizang hi. Hih hunah ka lungsim hong lawng mahmah pawl khat om hi. Khatna, hih hun kizatna Jenks High School-ah Zomi sangnaupang mi zanih pha cih Dr. Chin Do Kham in hong pulak ciangin, Zomite khantohna lim khatin ka tuat hi. Nihna, fashion show, nam lam (lamvui) leh khattang lasak a kipan music tum pawlte siam kasa mahmah hi. Khangnote zum se loin stage (podium) ah amau hih ding hong hih ziahziah ciangun, Chairmanpa Vung Lian Mang kiangah, “A khangto hi mawk ve hang aw” ka ci hi. Thumna, la kisa khempeuh ka ngaih ciangin Minam vai kikhopna ahih hangin Pasian phatna la mah kisa ciat a, “Topa, Pasian-a a nei minam, ama luah dingin a teelna a ngah minamte thupha ngah ahi hi” (Late 33:12) cih hong ngaihsunsak hi. Pasian phatna lathak hih bangin koimun koimunah i sak ziahziah ciangin khanlohna in i society hong zeel zo mahmah ahih lam kimuh thei hi. Lina, Tulsa sungah Zomi 1100 val khawng om khin zoin, tuban kum nih kum thum sungin mi tul thum bang kipha dingin lamen uh ahih manin pilna siamna tawh hi peuh mah loin Pasian in Zomite leitung gam khangto US hong puak lamdang kasa hi. Ngana, thu leh la kikupna limtakin zan nih hong neihpih uh hi. Minam vai a kipan khantohna ding lunghihmawhna thu tuamtuam hong dong uh hi. Ka theihna leh muhna a kicin loh hangin hih bangin thu leh la tawh hong tutpih uh thupi sa mahmah ing.
4. Zin leh lengla do: Oklahoma Zomi innkuan chairman Mangpi leh secretary a sem Kimpu-ten, ka zin tunna ding u Ngo Khen Zamte innah hong kha uh hi. Inntekpa Ngo Khen pen Florida lamah na om-zaw a, a zi nu Lian leh a tate'n maitai takin hong zintun uh hi. Nu Lian in ann lim mahmah tawh hong vaak phitphet hi. Tua munah zan khat ka giah zawh ciangin thu leh la saina a nop zawk ding deihna in Dr. Chin Do Khamte innah ka kisuan hi. Sia Do Kham zi leh tate tawh giak khawm ne khawmin ka om tak uh ciangin 1977-78 kum khawnga Saipimual dong thugen a ka pai lai leh amau innah ka giah lai khawng hong phawksak hi. Aman Tulsa pawlpi siateng leh Sia Mangpi tawh breakfast hong nekpih a, Rev. Dr. Kham Khan Khai in zong Do Kham leh Mangpi mah tawh breakfast nong nekpih hi. Rev. Cin Khaw Kham leh Tang. Khan Kham Gualnam, Suan Khan Kimte innkuan, Rev. Thawng Khan Cinte innkuanin leh Zomi Innkuan Oklahoma makaite'n ann lim mahmah hong nekpih ciat uh hi. Topa Pasian in amaute thupha hong piaksak hen.
|
