|
HIANGMUN KHOPPI SIMNA
By Dr. Hau Za Cin
Zomi Baptist Church
4th Triennial Mission Kikhoppi
Hiangmun, Mizoram
March 12-14, 2010
“Sia Cin, i bansah vang, Sia Cin, i bansah vang…,” hong kicih ziahziah ciangin Hiangmun khoppi nuam mahmah ding hi cih ka mu khol pah hi. Mawtawpi tawh khuamual kisuak ciaiciai, pawlpi mi hong mu masa peuhmah in tua bangin hong vaidawn ciangin gim leh tawl teng hong veng pah in, huihkhi siang diik bangin i om hong nuam pah hanhan hi. Zin hong hawm uh a, kei pen ZBC gambup ah Upa ordination ngah masa pen Upa Cin Khen Khup inn ah hong tungsak uh hi. Innsung lianpi, inn zong a golpi ahi hi. A inn bek gol, a sung bek lian hilo in, a lungsim uh zong lian hi. Ka kisilna ding tuilum hong suansak uh a, ka kisil khit ciangin tui phelkhai khat (one bucket full) khawng bek neilai uh hi cih ka thei hi. Tui hamsa, tui tawi ding omlo. Aw! …meigongnu sathau bing hong phawksak si e maw! A zah tampi in Topa in thupha tawh na vukkikta hen.
A zingciangin khoppi sim ding a tamzaw hong tung ziahziah. Teikhang khua pan hong tung masa pen, Mimbung khua in hong zompah hi. Tua zawh ciangin Vaikhawtlang pan, Sesih, Leisenzo, Champhai, Ngur, leh Aizawl in hong zom in, Hnahlan, Murlen, Vapar te zong cidam takin hong tung diamdiam uh hi. Siate leh Shillong lamte ama niin na tungkholta uh hi. A zindo pawlpi teng khoppi sung Tui dawn ding buaipih in zanhak liangin tui tawi in, gamkang phelh tawh na buai mahmah uh a, ahi zongin pangkhawm semkhawm diamdiam in vaidawn leh zinhawmte zo takin sem ziahziah uh hi. Zomi te khantohna lim leh mel atakin a kimu ahi hi.
Tunkim Nitak kikhopna ah Upa Kam Ngaih Thang phuah vaidawnna la Zola awkaih tawh hong sak uh ciangin eima inn tung bangin i om hong nuam pah lian hi.
1. Zalna khatlo Sian vontawi teng, Sian in tui bang hong gawm zel a,
Zolei tang bang i dam kim nam, Banzal ziat siang kilen dih ni e.
b. EM khoppi nunnuam zo khawm ni, Sian min lawibang a thanna ding,
Laukha siangtho Jesu aw, Lai ah hong bual aw.
2. Sianmang sinthu philtang bang theh, Sianmang sawlsang Lia leh Taang,
Na sung aw, Sian aw, na sung aw.
b. Tongsuah zu bang a khumlo zong, Miza sinlai a phawng dingin,
Laukha siangtho hong leng aw, Sian aw hong leng aw.
Khualzinna lamsau mahleh kuamah lusu leh ihmu omlo in vaidawn kikhop a tawp dong nuamtakin kinuikhawm, kilam khawm, thungen khawm, la kisa khawm ziahziah hi. Vaidawnna leh Maitang Lahna ah Missions Secretary Sianu Awi Ngaih Lun in Siate Rev. Suan Khan Thang, Executive Secretary; Rev. Gin Lam Thang, Shillong Area Pastor; Rev. Dai Do Thang, Aizawl Area Pastor; Rev. Cin Khan Tuang, Champhai Area Pastor; Evan. Lian Go, i/c Hnahlan Area Pastor; Evan. Zel Thang, Champhai, Evan. Za Biak, Hiangmun; Evan. Hau Za Khup, Mimbung; Rev. Awn Kham, ZBCM Missionary, Vangteh; leh Evangelism and Missions Committee members te leh khua tuamtuam pan hong pai Upa leh pawlpi mite dingsak in vaidawnna hong nei a, khut kibeng ziahziah hi. Khoppi sim lak pan khuatual pawlpi Hiangmun tam pen hi.
Zingsang sim in Ki-apna hun Evan. Lian Go leh Evan. Zel Thang in hong makaih in mipi in nuam kisa, kimetpih in tha kingah mahmah hi. Ninoni zingsang kikhop ah Indian Evangelical Missions missionary Rev. G.K. Ngaihte in ama nasepna hong pulak in, hanthawtna zong hong nei a, missions nasepna khangnote mawhpuak lianpi hi ci hi. Amah ZBC in i vak Pasian gam ading nasem khat ahi hi. Khoppi tawp nitak in zong missionary i vak mah Rev. Awn Kham in ama nasep pulakna leh Pasian thu tawh hanthawtna hong nei hi. I missionary vak te nih in Missions Khoppi hong zatpih theih banah amau nasepna hong pulak thei uh ahih manin Mission Khoppi a gahpha, a manpha leh a lawhcing hi ciin ka ciamteh hi. Pasian gam zai nading nasep tawpsanlo in hatzaw sem in panla ni.
Ninoni sun hun pen Khuasung Hawlna ding hun-awng (sight seeing) in kikoih a, pawlkhat in Zomi tenna khuapi khat ahi Mimbung khua vahawh a, pawlkhat Hiangmun khuasung hawl in, pawlkhat in meltheih u leh nau veh in, pawlkhat in Pasian thu tawh holimna hun tuamtuam zang uh hi. Khuatual nungak tangvalte nitak lam ciangin khuataw ah gam kang ahih manin meiphelh dingin kuankhia uh a, zan nai 12 ciangin zong meiphelh dingin tai kik uh hi. Gam keu ahih manin gamkang tam a, gam kangleh khua lumsak semsem ahih manin gam kangsaklo dingin mipi hanciam kisam mahmah hi. Tui dawn ding a buaipih uh tawh, meikang a phelh uh tawh khuatualte gim mahmah ding uh hinapi maitai takin Biakinn lam zuan diamdiam in, hun nuamtak kizang khawm hi.
Khoppi hun ah thupi kasak penpen ahihleh Hiangmun khuapi inn 120 val sunga Biakinn om khempeuh hih ZBC Missions Khoppi sungin kikhak a, Khoppi hong uap khin uh hi. Late 33 sungah ‘sanggam banga a tukhawm dimdiam mite Topa muhna ah a etlawm’ ahih dan kigente hong phawksak hi. Ka zin ka vakna ah hih banga etteh huai, a kilawm gamtatna leh Pasian mina kalsuan khawmna ka mu naikei a, Hiangmun khua leh a khuamite ka zahtakna leh thupi kasakna a lian semsem hi. Zomi vive tenna khua ahih manin “‘A khangto toto Zomi te’ hi khong ve hang e,” ka ci hi. Khuadangte in zong hih bang kithutuakna etteh dingin hoih kasa hi.
“Tu tung Khoppi ah Sia Thang (Rev. Gin Lam Thang) thugen thangah pen ing” ci a mite kihona kaza sim a, ka zaksim bek hilo in kei tungah zonghong gen om tanghial hi. ‘Banghang ahi tam maw’ ciin ka ngaihsun ngiungiau hi. Banghanga mite in thangah diak uh ahi tam maw ka ci a, kuama kiangah lah ka dong ngam kei hi. Shillong ka tunkik ciangin, “Tu tung Sia Thang thugen a pai hiam?” ciin hong kidong vat mawk a, “Bang hang in maw…?” “Ko thu nakpi in na ngetsak hi ve ung, tun zong Sia Thang thugen pen mailam ah tha kingah semsem ding hi,” ciin hong behlap zawlai hi. ‘Hi maw, Pawlpi mite in i siate adingin thu nakpi in i ngetsak kisam hitah maw’ ciin ka ngaihsun hi. Guwahati ah a omlai in Sia Rev. Dr. JM Ngul Khan Pau in, “Thu ka gen ciang thu hong kingetsak leh hong kingetsakloh theihna khat nei ing, kibanglo hi,” cih gen ngei hi. Sia Thang adingin a khawk mipi in thu limtak a ngetsak lamtak uh aman theihna khat neikha ngel ding hi. A thei kei zongin mite thungetsakna hangin a thugen in vang nei hi cih kidawk hi. Thupi kasa hi. Pawlpi mite aw, i siate thungetsak ding eima tavuan hi. I mawhpuak, i tavuan i sep kei leh a sum ding eimah hi hang cih hong phawksak kasa hi. A gen a siamtuam hi kenteh, ahi zongin thungetna vang ama thugenna ah kilang hi!
Nipini zingsang zong Ninoni nitak mah bangin Kha Siangtho in hong ompih a, Pasian phata lamna, dianna leh lungdamna khutte lamto a Topa phatna hun nuamtak kizomto ngitnget hi. Kikhop khat ah phatna lasa ding mi 10 pan 16 bang pha den a, a kisam khin manlo zong om kha phial ding hi. Pasian a lunggulh mite Topa in thupha pia hamtang ding cih ka um hi. ‘Gammial nasepna ah thapia ni’ cih thulu tawh ZBC Executive Secretary Rev. Suan Khan Thang in pawlpi mite hong hanthawn a, “Gammial nasepna ding mimal pan kipan ding hi. Piak khiatna tawh kizom a, neih leh lam sum leh pai bek hilo tanu, tapa leh hun leh nuntakna nangawn Topa adingin piakkhiat ngam kisam hi,” ci hi. A citak nungzui suahna ding leh a muanhuai Topa nasem suahna ding zong limtak gen a, Pasian thu a manphatna leh hong nusia ngeilo Immanuel ahihna zong gen hi. Tha kingah a, hun tomno cik sung tawh kibang hi.
Nipini Sun hun ah Khangnote Hanthawtna Hun ciin Dr. Hau Za Cin in ama zinna leitung gam tuamtuam maan te Computer pan in lak in, hanthawtna tawh zomsuak a, tha kingah mahmah hi. Leitung kimvial a Topa in khatvei khual a zinsak thu leh a khangto gam peuhmah Pasian phawka kalsuan gam leh minam ahihna thute gen a, Zomi te zong Pasian phawka kal i suan manin ‘a khangtoto minam’ ihi hi ci hi. USA ah Zomi tul thum val omte, Australia ah Zomi om, Japan, Singapore, England, Germany, Norway, New Zealand, etc leh, leitung gam khangto khempeuh ah Zomi om a, tua pen eima thahatna hilo in Topa hong lapsangna, Topa hong domtohna Thupha hi, ci hi. Tua manin Topa phawk in mainawt zel ni. Pilna siamna zonna, nek leh dawn zonna, sep leh bawlna te ah zong Topa tawh kalsuan den dingin vaikhak hi.
Mangpha khak ni zan hong tung a, lungsim ka neunau hi. Khoppi lah nuam kisa panpan, a hun lah bei ding hita, lawm leh gual kimeltheih saan, kikholh hun ding lah tom semsem! Aw, leitung aw, laphuakpa in, “Tu nuam taleng ding, khawl nuam taleng pai, Hih leitung kikhenna gam hi,” acih mah bangin, “Omkhawm lai leng nuamlai, hun te’n hongkhengta.” Ahi zongin, “Phat ni, heina peuh ah Topa Phat ni.” Hiangmun pawlpi in Mangpha khakna la hong sa uh a, zing khuavak cianga ciah ding khempeuh lungsim ah lungzuanna thelbang tho hi. Mipi lasak nop semsem a, lamna, dianna te zong ki-am semsem hi. Hun uk , thugen, lasa leh lungdamkohna hunte in hong kheng a, ut mah taleng kikho theilo, ngai mah taleng kisamkik theilo…Hiangmun khoppi a tawpna kitung ta.
Mangpha kikhak in khut kilen, mittang ah ki encim theilo, lungzuang takin kikha, ‘Khoppi kik ciang kimu ni aw’ ci a thupha kipia in, eima lupna lam ciat kizuan ta hi. Tua zan tung Solkhapi lah taang pha sem a, ihmut pah ding ollo hi. Holim kawmkawm in ‘kholhkhop hunnuam’ ki-am a, hocim manlo Ak masa hong khuanga, lupna kidenna in mengme pan cih ciang Ak thumveina hong khuang leuleu, mit nuai kawmkawm in lupna pan kitho, Aizawl lam zuan dingte Bus pai hun hong tung… lakik thei leng maw…
Van teng kiguang khin, Bus sungah Upa Cin Lian in cidam taka ka khua leh tui ciat uh tung dinga Topa tungah vai khempeuh hong apsak khit ciang ka paita uh hi. Lia Piangi leh Lia Thang Man te in Hiangmun khuanawl Humpi Mual gei tan hong kha uh a, ‘cidam in mangpha aw’ a cih khit uh ciangin Bus in hong taipih suak a, Hiangmun pel, Teikhang tungphei, cidam in Aizawl nitak nai 7:00 in tung. A zingciang Sia Gin Lam Thang tawh Shillong ka paisuak uh a, cidam in March 17, 2010 zingsang nai 9:00 in ka tung uh hi. Ka zinnu uh Nu Niang Khaw Cing w/o Upa Cin Khen Khup in hong puaksak Betehkeu ka huan uh a, a ne khempeuh in “Hih Beteh limsi e, a ngek vive kiphek hi maw,” ciin gilvah tak in ne ciat uh hi.
Topa in khoppi pai khempeuh amau khua ciat cidamin tungkik sak a, ni khat ni ciang kimu kik dingin hong kem hong huaiden lai ding hi. Vangliatna, Minthanna leh Thupina khempeuh Topa bekin tang tawntungta hen. Amen. Khoppi sim zin 270 pha hi.//
|
