Rev. Suan Khan Thang

Executive Secretary, ZBC

April 9, 2010 ni-a Tedim khua a Zomi Christian Literature Society (ZCLS) sunga Board of Management meetingna-ah a thu ngaihsut khat “Minam bup in la kibang neikhop ding” cih thu in ka lungsim hong lawng kha mahmah a, tua bang lungsim lian leh tupna thupi I neih pen minam khangtote zia ahi hi.

I minam bup in biakna Labu sunga English la a kiletkhiate, a thu kibang I neih nadingin a kul leh, I sepsate sup ngam, mindai a kul leh zong thuak ngam kisam hi. Tu hun laitaka biakna makaite in khaici hoih lo (tangpekna khaici) I tuh khak leh, I tu leh tate mailamah kikhento suak ding uh a, khaici hoih (kipawlkhopna khaici) I tuh leh, minam neu dangte nangawnin Tedim pau a zang Zomite hong pawm ding uh hi. La pen, a thu  hoih leh a maan I deih luatna hangin Pawlpi tuamtuamte i tangpek tek sangin, a la thu in Pasian min daisak liang ahih kei nak leh, Pawlpi tuamtuamte kipawlkhawmin ma I bunkhop ding tu laitakin kul masa pen hi. A la thu khawng pen mailamah Pawlpi tuamtuam panin makaite kikumin, a kicing zawin hong puahpha toto ding uh hi. Tua banga puah hun a om zenzen leh Rev. S.T. Hau Go’ la lehkhiatte zong (a thuneite in a phal uh leh) et huai ka sak pawl a om hi. A  gualtawp a thu kihual (rhythm) hoih a, I Zopau maan zang hi.

Pawlpi tuamtuamin la kibang nei lehang :

1. Nopni dahni a I ki-uapkhop ni ciangin I la theih kibang tek ahih manin, lasak nuam mahmah ding hi.
2. Pawlpi khempeuh zat theih dingin Labu hong kicing ta ding a, Labu I khet ciang zong a tul sawmsawm in kikhen thei ding a, a man tawm tuam ding hi.
3. Minam dangte in Tedim pau a zang Zomite kipumkhatna hong muin I la hong sakpih ding uh hi.
4. Zomite teenna khua tuamtuam (Tedim, Champhai, Lamka, Kuala Lumpur, Tokyo, Texas, Melbourne, London, Singapore etc.) ah khual I zin ciangin amau la theih leh ei la theih kibang ding a, tua in kikholhkhopna nuamsak tuam ding hi.
5. Pawlpi dang pan hong kikhawm I mote leh I zin le lengte in I biakna la hong sakpih thei pahpah ding hi. I tate in a pute biakinn ah a kikhop ciang zong, a la uh sakpih thei pahpah ding uh hi.
6. Pawlpi tuamtuamte hong kinaisak tektek ding hi.
7. Sanggam khat pumkhat suakin la kibang I sakkhop pen Topa muhna ah zong kilawm ding a, Pasian in thupha hong pia ding hi (Late 133:3).

I pankhawm diamdiam ciangin kikhawsuak hi. (United We Stand)

Pawlpi tuamtuam in La a tuam tek nei hi lehang :

1. Nop ni dahni a I ki-uap ciangin I lasak theih kibang lo ahih manin, gualnuam takin la sakkhop diamdiam cih bang piang thei lo ding hi.

2.  Pawlpi bangzah hiam in a biakna Labu uh a kizomin khen den zo lo ding a, mi tawmcik ading Labu tawmcik kikhen pen a labu man tam pah ding hi.

3.  Minam dangte in I kithutuak loh zia muin, amau’ biakna la a sakpih dingin hong zawn ding uh a, I mite in zui lai ding uh hi.

4. Kawlgam pualama Tedim pau a zangte in amau zat ding Labu kibawltawm tek ding uh a, khualzin ciangin Kawlgam sung a Tedim pau a zangte tawh la kisakhawm thei nawn lo ding hi.

5. Pawlpi dang pan hong kikhawm I mote leh I zinte in I biakna la sin tawm thapai se ding uh a, I tute in a pute biakinn ah a kikhop uh ciangin a la uh sakpih thei lo ding uh hi.

6.   Pawlpi tuamtuamte kilangneihna, kituambawlna khangsak semsem ding hi.

7.   Sanggam khat takpi, la kibang nangawn sakhawm thei lo a, tangpeek tek I hihna mite in hong thei ding a, zumhuai lua mahmah ding hi.

I tangpeek tek ciangin kikhawsuak zo lo hi. (Divided We Fall)