Kawlgam kumpite in tukum Burma's Independence Day, January 4,2010 ni in Kawlgam sungah amau hanciamna tawh mipite ading na hoih semmi pawl khat minphatna thupitak pia uh a, tuate sung pan Falam(Chin) minam biakna min tawh nasem Christian Charitable Organization

minthang mahmah khat ahi "I Love Myanmar" pan Dr.Levi Sap Nei Thang @Sapte (Founder and President) zong "Myanmah Hlutlatyi Kungyi Mawkuinwin" minphatna lianpi kipia hi.

Dr.Levi Sapte makaih " I love Myanmar" in Kawlgam sungah State mun tuamtuam ah mizawng migentheite huh in,pil sinna sanginnte, Zato inn, biakinn leh inn leh lo neilote akipan kumpi zatopite ah huhna tampi pia khia hi. Tua bek tham loin, Khamtung khuaneu tampi puahin, tuitha tawh khuaphelep mei (hydro power) pia hi. Motor tun lohnate ah lampi bawlin Kumpite tawh sem khawm hi. A beisa 2008 kum Cyclone Nargir hangin Yangon Division leh Karen State sungah inn le lo neilote inn tampi lamsak hi.

Dr. Levi Sapte pen Chin State ah suakin Yangon ah khang khia numei khat ahi hi. Computer lam uk ahih manin website bawl khawng kisin sin hi. Website sungah gamitna lakam (poem) te koihkoih zel hi. Pasian lam lahna tawh America ah pilna sinin khangto hi. Mikangte mah bangin pau leh lai siamin minam leh gam a veiina lungsim khang semsem hi. gam le minam itna lungtang lian sem ahih manin nikhat ni in " I Love Myanmar" ci in kawlgam zuunna ding kipan khia hi. Pasian in a veiina thupha pia in lawhcing mahmah hi.

Pasian awina tawh a pasal Mr. Daniel tawh kiteng in tapa Samuel leh tanu Emmanuel nei uh hi. 2008 kumin Kawlgam ah Cyclone Nargis huh dingin US pan a innkuan un Kawlgam ciah uh hi. Karen State ah huhna pia in a om laitak a tanu Emmanuel sungpai leh cisa tawh Sept.17,2008 ni in sih suah uh hi. Hih bangin a tanu a sihsuah ciangin a tanu phawkna tawh Emmanuel Foundation and Emmanuel Charity min phuak nasep behlap leuleu hi. A nasepnate lawhcing semsem in United Nation (UN) nangawn in theihpih hi. Kawlgam ah a nasepnate thupi lau leh lawhcing lua mahmah ahih manin kumpite nangawn in zahtakna leh pahtawina pia ta uh hi.

Dr. Levi Sapte in anasepna tungtawn in mihing tawh kisai nasem taktak hihna Honorary Doctorate degree pen February 2009 sungin Asbury Theological Seminary,USA pan kipia hi. Kawlgam sungah a nasepnate pen Kumpi khat nasepna zahin lianin thupi hi. Kawlgam mun khempeuh ah piaksa pen US$ 1000,000 asim phata ding kilamen a, mai lamah Zogam,Shan gam leh mun tuamtuamte ah zong nasiatak sepsawm lai hi. Tua manin Kumpite in Kawlgam sungah nasep hanciam micitak cih pahtawina " Myanmah Hlutlatyi Kungyi Mawkuinwin" cih minphatna sang pen pia uh hi.

Hih banga Pasian min tawh Kawlmi le Zomi deidan lo a, Pasian itna bulphuh a nasem minthang Dr. Levi Sapte leh " I Love Myanmar"  team khempeuh zahtakna leh pahtawina Tongsan Weekly pan zahtakna leh pahtawina i puak hi. I Love Myanmar khan sawt hen!!!

Reported by- Tongsan tanute
Source: Chinland Gaurdian